-->
البيتزا

طريقة عمل البيتزا فى المنزل


كل الرجالة دايما مابيشكروش فى البيتزا البيتى وبيقولوا عليها كيكة
احنا بقى عايزين نغير الموضوع دا وياريت نتناقش مع بعض فيه ونشوف
 العيوب وعلاجها 

المقادير

3 كوب دقيق
2 ملعقة كبيرة لبن بودرة
ربع كوب زيت ( ويفضل زيت زيتون)
ملعقة من الزعتر الجاف
ملعقة صغير ملح
2 ملعقة كبيرة سكر
ملعقة كبيرة خميرة فورية
كوب ماء دافئ

مقادير صلصة البيتزا

2 فص توم مفروم
2 ملعقة كبيرة زيت
كوب عصير طماطم
2 ملعقة صلصة لو متوفر
ملح وفلفل أسمر وزعتر جاف

الطريقة

نخلط الماء الدافئ مع الخميرة مع السكر ونسيبها شوية على ماتتفاعل الخميرة
بعدين نضيف بقية المكونات على بعض ونضيف عليهم خليط الخميرة
نعجن الخلطة دى كويس زى ماتعودنا نعجن بذمة 
بعد كدا هانسيب العجينة تخمر فى مكان دافئ لمدة ساعة
بعد ماتخمر هنفرد العجينة دى فى صينيتين ونخرم العجينة بشوكة ونحط عليها الصلصة

طريقة عمل الصلصة

هاندبل التوم فى الزيت وبعدين ننزل بالصلصة وعصير الطماط والزعتر والفلفل الأسمر 
ونسيبها تتسبك وبعدين نظبط ملحها

ملحوظة
لازم الصلصة تكون باردة تماااما قبل مانحطها على العجينة

فوق الصلصة هاتحطى الموتزاريلا على حسب ماتحبى
وفوقها الحشو اللى عايزة تعمليه

التسوية

هاندخلها فرن مسبق التسخين
وتوضع فى أرضية الفرن على درجة حرارة 180 
ولما تستوى من تحت  هانخرجها ونحط على الوش موتزاريلا ومشللة ونشغل الشواية ونحط البيتزا تحت الشواية علشان الجبن تسيح ويكون شكلها مغرى

مهم جدا علشان مايتقلش عليها كيكة بالجبنة ناخد بالنا مش شوية حاجات :

- طبعا عجينة البيتزا لازم تكون رقيقة.
-الجبن لااازم تكون بدرجة حرارة الغرفة
-يعنى ماينفعشى تطلعى الموتزاريلا من الثلاجة تستخدميها مباشرة.
-لازم ولابد يكون الفرن مسبق التسخين
-لزوم المط بقى زى التليفزيون هاتضيفى المشللة السورى مع الموتزاريلا
-إجمالى وقت التسوية هايبقى أقل من ربع ساعة علشان ماتنشفش

ولو قال عليها كيكة يبقى العيب منه
🙌🙌🙌🙌
بالهنا والشفا






مطبخ سمسم
كاتب المقالة
كاتب ومحرر اخبار اعمل في موقع مطبخ سمسم .

جديد قسم : معجنات