-->

طريقة عمل قطايف رمضان من الألف إلى الياء فى البيت
هانعملها إن شاء الله من أول العجينة لحد مانقدمها
يعنى مش هانحتاجى تشتريها جاهزة



طريقة عمل القطايف

المقادير


  • 2 كوب دقيق منخول
  • نصف كوب دقيق سميد
  • 2 ملعقة كبيرة سكر
  • 2 ملعقة كبيرة لبن بودرة
  • ملعقة صغيرة خميرة فورية
  • ملعقة صغير بيكينج باودر
  • نصف ملعقة صغيرة ملح
  • 2 ونصف كوب ماء دافئ


مقادير عجينة القطايف

الطريقة


  1. نضيف كل المكونات على بعض ونقلبها كويس 
  2. نضيف الماء الدافئ ونضرب فى الخلاط أو بالهاند بليندر
  3. نتأكد كويس إن العجينة مافيهاش أى تكتلات وقوامها سائل زى عجينة الكريب
  4. بنغطيها باستريتش ونسيبها تخمر نصف ساعة مش أكتر
  5. نسخن الطاسة على النار وونشكل عليها العجينة بالحجم المطلوب 
  6. نهدى النار علشان ماتحمرش قبل ماتستوى كويس
  7. بنعرف إنها استوت لما تاخد الشكل المسامى المميز للقطايف ويستوى كل العجين اللى على الوش
  8. هانخرجها على فوطة ونغطيها بالفوطة علشان ماتنشفش وتتقطم وانتى بتحشيها
  9. هاتحشى القطايف بالحشوة اللى بتفضليها والشكل اللى تحبيه
  10. نقليها فى زيت غزير ساخن جدا علشان ماتفكش
  11. لما تاخد اللون المفضل نخرجها على الشربات على طول
  12. الشربات لازم يكون بارد وتقيل لزوم القرمشة ولو بتحبيها طرية يبقى الشربات ساخن
  13. طبعا التقديم والتزيين راجعلك إنتى


كنوع من التغيير هنا أنا عملت شكل مفتوح من ناحية وحشيته بحشو القشطة العربية الفاخرة
ممكن تستخدميها أو تستخدمى كريم شانتيه , قشطة كدابة , نوتيلا .

بالنسبة للقشطة العربية الفاخرة فدى طريقة تحضيرها :

هاتسخنى كيلو لبن وقبل مايغلى مباشرة هاتضيفى 3 ملعقة كبيرة خل هاتلاقى اللبن قطع أو جبن معاكى 
هاتستنى لما يفصل تماما وبعدين تصفيه فى المصفاه وناخد الجبنه من المصفاه وتسيبيها تبرد على مانجهز المهلبية

ودى طريقة المهلبية :

كيلو لبن مع ملعقة ونص نشا وملعقة ونصف دقيق وملعقتين سكر ونقلبهم كويس لحد مايدوبوا فى اللبن على البارد
بعد كدا نرفعه على النار ونقلب لحد مالخليط يتقل ويعمل مهلبية

هانخلط الجبنة مع المهلبية فى الخلاط  , ودى تبقى القشطة العربية الفاخرة اللى بنستخدمها فى حشو البسبوسة بالقشطة والكنافة والجلاش .



لطريقة عمل الكنافة النابلسية إضغطى هنا





مطبخ سمسم
كاتب المقالة
كاتب ومحرر اخبار اعمل في موقع مطبخ سمسم .

جديد قسم : تحلية