-->

كيك الجيلى 


طعم جميل وتغيير عن الكيكة المعتادة من ناحية وعن عمل الجيلى بشكل تقليدى من الناحية الأخرى
ومنظر جذاب للأطفال

طريقة عمل كيك الجيلى

مقادير الكيك


  • 4 بيضات
  • 3 كوب دقيق
  • 2 كوب سكر
  • كوب لبن أو زبادى
  • كوب زيت
  • كيس بيكينج باودر
  • كيس فانيليا 
  • ملعقة كبيرة خل


الطريقة

  1. بنضرب كل المكونات فى الخلاط ماعدا الدقيق والبيكينج باودر
  2. نخلط الدقيق والبيكينج باودر مع بعض كويس فى بولة منفصلة أو طبق
  3. نفضى الخليط الأول فى طبق وننزل عليه بخليط الدقيق والبيكينج باودر بالتدريج مع التقليب بالمضرب اليدوى
  4. بعد مايتكون معانا خليط متجانس بدون أى تكتلات ننقله فى صينية مقاس 32 متبطنة بالطريقة اللى بتفضليها
  5. ندخلها فى فرن مسبق التسخين على درجة حرارة 180 حتى تمام النضج
  6. نطفى الفرن ونفتح  الباب ونسيبها جواه 10 دقائق والفرن مطفى
  7. نخرجها ولما تبرد نشيلها خالص من الصينية من غير مانقطعها


ملحوظات
تبطين الصينية ممكن بزيت أو سمن ودقيق أو ورق زبدة (زى ماتحبى) .
لو هاتسويها فى فرن كهربائى بتشغلى الفرن والشواية مع بعض , أنما لو فرن غاز بتشغلى الفرن فقط بدون الشواية.
مش بنضيف البيكينج باودر فى الأول لإننا بنستخدم الخلاط مع المكونات التانية وكتر ضرب البيكينج باودر بيضيع تأثيره .

طريقة عمل الجيلى 


وركزى كويس معايا لإننا هانعمله بطريقة مختلفة عن العادى .

3 باكو جيلى بندوبهم فى كوب ونص ماء ساخن وبعد مايدوب كويس هاننزل بكوب ونصف ماء ساقع جدا .
ونقلب كويس وننزله فى نفس الصينية اللى عملنا فى الكيكة (بعد غسلها طبعا) .
نسيبها فى الثلاجة على ما الجيلى يمسك كويس وبعدين نطلعها , ولو عايزه تضيفى شرايح فاكهة على الوش أو ممكن من غير .
هانضيف دلوقتى الكيكة فوق الجيلى بعد مانتأكد إنه ربط كويس فى نفس الصينية .
نجهز 2 باكو جيلى بنفس الطريقة اللى قولنا عليها ونوزعها على الكيكة بحيث نسقى بيها الكيكة كلها.
ندخلها الثلاجة 3 ساعات على الأقل.
نخرجها من الثلاجة وقت التقديم ونقلب الصينية على طبق التقديم ونجيب فوطة مبلولة ماء سخن ونغطى بيها الصينية المقلوبة علشان الجيلى يفك منها من غير مايتجرح .

ملحوظة
مش بنعمل الجيلى بالطريقة المكتوبة على العلبة علشان يبقى أتقل فى القوام

لمشاهدة مواضيع أخرى من قسم التحلية إضغطى هنا
لطريقة عمل كيك التفاح بالقرفة وصوص الجبنة إضغطى هنا
لطريقة عمل الباونتى كيك إضغطى هنا
لطريقة عمل جاتوه شاتوه إضغطى هنا





مطبخ سمسم
كاتب المقالة
كاتب ومحرر اخبار اعمل في موقع مطبخ سمسم .

جديد قسم : تحلية

إرسال تعليق